القائمة
أنقر الصورة للمزيد من المعلومات عن البلدةتمّ تجميع هذه الأمثال الفكاهيّة من البيئة المحلّيّة في الغالب, وهي مسلسلة بترتيب أبجدي كالتالي:
- إبتيجي مع العميان طابات
- إبعد عن الشرّ وغنّي له
- إبعظّتُه ولا اببوسة غيرّه
- إبزمان الخير ما غنّينا يا ليل
- إبن الحرام بيساويها, وابن الحلال بيقع فيها
- إبن الحلال عند ذكره بيبان
- إبن بطني بفهم رطني
- إبنِك على ما ربّيتيه وجوزِك على ما عوّدتيه
- أبو بالين كذّاب
- أبو رطّة رُطّوها, جيبوا الخوصة وقُطّوها
- اتبدّلت غزلانها بقرودها
- أتجوّزنا تا ننستر, سقى الله على أيام الفظيحة
- إتدلّعي يا خبّيزية في الزّبادي العوج
- اتطلّع في وجه البقرة قبل ما تحلبها
- إتعب اقدامك ولا تتعب لسانك
- إتغدّى واتمدّى, واتعشّى واتمشّى
- إتفظّى القرد لمعط الجلد
- أتلمّ المتعوس على خايب الرّجا
- أجا يشيل خاروف قام طقعه, جرّب يشيل أمّه
- أجا يكحّلها عماها
- أجاك يا بلّوط مين يعرفك
- أجت الحزينة تا تفرح, ما لاقتلهاش مطرح
- أجت الخيل تا تحذي, قام الفار مدّ رجله
- إجحاش العُربان (أو اجحاش البدو) ما بتمشي إلا في الوَعِر
- أجوا يعاونوه في قبر أبوه, فلّ بالقزمة وهاتوا الحقوه
- أحلى من العسل خلّ اببلاش
- إحمارٍ تركبُه ولا غزالٍ يِركبَك
- إحمارتك العرجة ولا جميلة الناس
- إحمارُه امغرّز في الوحل, وجمَلُه دابِك بالرّحِل
- آخر العنقود سكّر معقود
- إذا أعطيت الأعمى عيونك بطمع في حواجبك
- إذا إنت أمير وأنا أمير, مين يسوق الحمير؟
- إذا انجنّوا ربْعك عقلك ما بِنفعك
- إذا بدّك تحيّرُه خيّرُه
- أذكر الكلب وحضّر له العصاة
- أربط الحمار محلّ ما بدّه صاحبه
- إرتاحت القرعة من كدّ الامشاط
- إرجعنا نُحصد عقير
- إرخّيّص وكويّس وإبن ناس
- إردبّ ما هو إلك لا تحضر كيلُه, بتعفّر عينيك وبتتعب في شيلُه
- إرظينا بالهمّ والهمّ ما رظي فينا
- إستكبِرها ولو عجرة
- إسمع كلام الاصلع واستشيره, هذا شعره وقع من كثر تفكيره
- إشبعنا وشبعت كنّتنا
- إشتري وبيع ولا تخلّي إسمك يضيع
- إشي بيحطّ العقل في الكفّ
- إشي بيرمّي اللّقمة من الثّمّ
- إشي بيلاهي الحمار عن عَليقُه
- إشي بينسّي البدوي عباته
- أطبخ يا عبدي, كلّف يا سيدي
- إطري سيرة الذيب بيجيك من قريب
- إطعم الثمّ تستحي العين
- إظراط على بلاط
- إعرج يسحب مكسّح, يقول له تعال تا نتفسّح
- أعزب دهر ولا أرمل شهر
- أعطي الخبز لخبّازه ولو أكل نصّه
- إعمص وبتقعمص
-إعملها في الرّجال وانساها, واعملها في النّسوان واستنّاها
- إعملي يا فاخرة إلك وللآخرة
- إعوج وبتطعوَج
- إعور لا تداقره, واقرع لا تناقره
- إعوي يا كلب وارتاح يا قلب
- أكّالين ونكّارين مثل البساس
- أكبر منك بيوم أعرف منك بسنة
- إكبير وبتدلّع, مثل الباب المخلّع
- أكثر من الهمّ عالقلب
- أكثر من هالقرد ما مسخ الله
- إكحيلة ومواريها بو مُزراق
- أكل الرجال على قدّ افعالها
- أكل الهديّة وكسر الزّبديّة
- أكل الهَوا للواطي دَوا
- أكل قتلة قوم اقعاد, قال ولّ ما معاها زاد؟
- أكل ومرعى وقلّة صنعة
- أكلة ما فيهاش قَرقَطِة اعظام ما اتعِدّهاش بين الطعام
- أكلة وانحسبت عليك, كل منها وفتّح عينيك
- الابواب امغلّقة والهموم امفرّقة
- الأسى ما بينتسى
- الاعور في بلاد العميان سلطان
- الإيد اللي ما بتقدرش تعضّها, إدعي عليها بالكسر
- الباب اللي بجيك منه الرّيح, سدّه واستريح
- البرطيل بيحلّ دكّة القاظي
- البشع بشع ولو اتحمّم كل يوم, والحلو حلو ولو قام من النوم
- البيت ضِيّق والجحش رفّاص
- البيض ما بتقلّى بظراط
- التّاجر المفلس بيدوّر في الدفاتر العتق
- التّعليم في الكبير مثل الدّق في الحمير
- إلحق (إتبع) الغراب بيدلّك عالخراب
- إلحق العيّار لباب الدار
- الجمل لو بار بيحمل القنطار
- الجمل ما بيشوف عوجة رقبته
- الجنازة حامية والميّت كلب
- الجنّة من غير ناس ما ابتنداس
- الجوز رحمِة ولو كان فحمِة
- الحاجّ حجّ والقمزة العتيقة فيه
- الحانوتي ما بضمنش جنّة
- الحظّ لما يواتي, بيخلي الاعمى ساعاتي
- الحكي ما عليه جمرك
- الحكي موش زيّ الشّوف
- الحمار بيظلّ حمار, ولو بين الخيول اندار
- الحيط الواطي كلّ النّاس بتنطّه
- الخبز السّخن محرّم عالكلاب
- الخير بالخير والبادي أكرم, والشرّ بالشرّ والبادي أظلم
- الدّار دار أبونا, وأجوا الغُرب يطحونا
- الدّنيا دولاب والدّهر قلاب
- الدّهن في العتاقي
- الدّيك الفصيح من البيظة بيصيح
- الرّجل بتدبّ مطرح ما تحبّ
- الزّايد أخو النّاقص
- الزّبدة لإم زبيدة والميصة لإم عبيدة
- الزّقر بيورث الفقر وآخرته للفراق
- السّكافي حافي والمحيّك عريان
- السلاح بيد ال... بِجرح
- المعدّلة بتغزل ولو برجل حمار, والمكشّلة بتقامِر خمسمين نجّار
- الشّرط في المارس ولا المقاتلة عند البيدر
- الشّهر اللي ما إلك فيه ما تعدّش إيامه
- الصّاج بيعيّر الكفكير, بيقول له يا اميتّم يا ازغير
- الصّباح رَباح
- الصّلح ورا العداوة أطيب من الحلاوة
- الصيّاد بتقلّى والعصفور بتفلّى
- الضّرّة تغور ولو كانت في قصور
- الضّرّة مُرّة
- الطاقيّة ما بتوسعش راسين
- الطّايح رايح
- الطّبخة اللي بكثروا طبّاخينها بتبوز
- الطّفر بعمي البصر
- الطّمع فرّق وما جمّع
- الطول هيبِة والقُصر خيبِة
- الطويلة طالت التّينة, والقصيرة ظلت حزينة
- إلعب في المقصقص تا يجيك الطّيار
- العروس للعريس والتّعب للمتاعيس
- العزّ للرّز والبرغل شنق حاله
- الغايب ما له نايب والنّايم غطّوا راسه
- الغزال بوكل والحمار امبحّر
- الغيرة من الأهل والحسد من الجيران
- ألف كلمة جبان ولا قولة الله يرحمه
- الفاظي بعمل قاظي
- القاظي راظي وانت ليش زعلان؟
- القدّ قدّ القولة, والصوت صوت الغولة
- القِدرة بتعيّر المِغرفة, بتقول لها يا مشحَرة يا سودة
- القدرة ما بتقعدش إلا عا ثلاث
- القرعة بتتباهى بشعر بنت أختها
- الكَبر عَبر, كان زمان وجَبر
- الكذب ما لوش رجلين
- الكسل ما بطعم عسل
- الكلب اللي بِعوي مَعاك أحسن من الكلب اللي بِعوي عليك
- الكلب وين ما قعد بينجّس
- اللقمة في إيد المسّر هِجنة
- الله يرحمِك يا نِفسي يا نفّوسِة, يا اللي عطستي بين ناس اتيوسِة
- اللي اببلاش كثّر منّه
- اللي امربّي قرد بعرف لعباته
- اللي أوّله شرط آخرته رضا
- اللي باعك ببصلة بيعه بقشرتها
- اللي بتوظّا بدري بيصلّي حاضر
- اللي بجيب لحاله شريك بجيب لحاله معلّم
- اللي بحظر السّوق بتسوّق
- اللي بدري بدري, واللي ما بدري بيقول كفّ عدس
- اللي بدّه يصون بناته, يتحمّل نكد مراته
- اللي بده يوكل ال... لازم يِقنى له مِعلقة
- اللي بطلع من داره بنقلّ مقداره
- اللي بوخذ إمّي هو عمّي
- اللي بوكل حلوتها لازم يذوق مرّتها
- اللي بوكل عا ضرسه بنفع نفسه
- اللي بوكل عُصي موش زيّ اللي بيعدّ فيهن
- اللي بيجرّب المجَرّب عقلُه امخَرّب
- اللي بيجي في الرّيش بخشيش
- اللي بيحطّ فلوسه بنت السّلطان عروسه
- اللي بيخاف من الغول بطلع له
- اللي بيدشَرنا عند العوزة ما إله عندنا عوزة
- اللي بيدقّ الباب بسمع الجواب
- اللي بيرافق النّورية لازم يرقص معاها
- اللي بيروح عا بلاد العوران لازم يِعوِر حالُه
- اللي بيزورنا حلّت البركِة, واللي ما بيزورنا بيخفّف لَبكِة
- اللي بيلاعب القطّ لازم يصبر على مخاميشه
- اللي تطبخه هالعمشة, جوزها منّه بيتعشّى
- اللي تنام ليلها وضحاها, العيشِة أرحم بلاها
- اللي ربّع ربّع واللي قبّع قبّع
- اللي سبق لبق
- اللي عا راسه بطحة بيحسّس عليها
- اللي عاجبه عاجبه واللي موش عاجبه ينتف حواجبه
- اللي عقله في راسه بعرف خلاصه
- اللي في القدرة بتطلّعه المغرفة
- اللي في بطنه عظام ما بينام
- اللي فيها مكفّيها
- اللي قِرشه محيّره, يشتري حمام ويطيّره
- اللي كواها البين تطبخ محشي
- اللي ما إله احباب بلتمّوا عليه الكلاب
- اللي ما بِعرف الصّقير بشويه
- اللي ما بيجي معاك تعال معاه
- اللي ما بيشوف من الغربال إعمى
- اللي مرَته بتضربه على صلعته بتطوّل له رقبته
- اللي معوش ما بلزموش
- اللي موش في إيدك بيكيدك
- اللي موش كارُه يا نارُه
- اللي نايمة على ظهرها, ما تستاهل مهِرها
- اللي يأكل حلوتها يتحمّل مُرّتها
- اللي يسمع كلام مراته, بتكثر عليه نكباته
- اللي يقول لمرَته يا هانم, يقابلوها على السّلالم
- المال الدّاشر بيعلّم الناس السّرقة
- المال بيجرّ مال والقمل بيجرّ صيبان
- المتعوس متعوس ولو علّقوا له عا قفاه فانوس
- المجانين إولاد ناس
- المَرَة إن كلّحت بتحارب بلد
- المستورة دارها عمار, والمكلّحة خراب ديار
- المقروص بيخاف من جرّة الحبل
- المكتوب بِنقرى من عنوانه
- الملافظ سعد
- الهريبة ثلثين المراجل
- الواشي زيّ الرّاشي, كيف ما أجت ماشي
- الولد البطّال بيجيب لأهله المسبّة
- الولد ولد ولو صار قاظي بلد
- إمّ اقوال غلبت إمّ افعال
- إم شوشة منبوشة, وفيها القملة مخشوشة
- إم عشرة إمدَبّرِة, وإم واحد متحيّرة
- إمجدّرة ولبن عافية على البدن
- إمزيّن استفتح باقرع
- إمشي في جنازة ولا تمشي في جوازة
- إن سرقت إسرق حرير, وإن قتلت أقتل أمير, ميشان لو عيّروك تستيهل التّعيير
- إن سِلمَت من سعيد, ما بجيها حدا من بعيد
- إن ضربت إوجع, وإن أطعمت إشبع
- إن عشقت إعشق قمر, وإن سرقت إسرق جمل
- إن فاتك اللحم عليك بالمرق
- إن كان حبيبك عسل لا تلحسوش كله
- إن لاقيت صاحبك طمّاع, إعمل حالك قليل حساب
- إن مال عليك الزّمان ميل على ذراعك
- إنتو جُقُمْ واحنا عورْ, وخلّي هالطّابق مستور
- أنجس من ذنبة الفار
- أهل الميّت صبروا, والمعزّيين كفروا
- إهواة الاعمى صيب
- أوّل الرّقص حَنْجَلة
- أول ما بيشِبّ إلا القَرِع
- إيش صبّرك على المرّ, قال اللي أمرّ منه
- إيش يوخذ الرّيح من البلاط
- باب النّجار امخلّع, وثوب الخيّاط امقطّع
- بارِم عا بارِم ما بُبْرُم
- باطح البدوي ولا تجاريه
- باع عمارة واشترى حمارة
- بحسد الاعمى على عصاته والجحش على مخلاته
- بحسد البسّ على عافيته
- بدّك اتبهدل رجّال, فلّت عليه مَرَة
- بدّك عنب والا بدّك تقاتل النّاطور؟
- بدل الشّيشة والدخّان, أستر جسمك يا عريان
- بدّه خبز مخبوز وميّة في الكوز
- بدّه عرس يُرقص فيه
- بدّه عزا يلطم فيه
- بِدّه عصفور وخيطُه
- بديناها سلّة طلعت قرطلّة
- بُرقص بلا دفّ
- بعد ما خبطها بو الحصينيّات وعشّرت؟
- بعد ما شاب ودّوه الكتّاب
- بعد ما طقعت شدَت لِيّتها
- بعرة ومقسومة بشعرة
- بعسلك يا نحلة ولا تقرصيني
- بُفتل القتيل وبِمشي في جنازتُه
- بقى في جرّة وطلع لبرّه
- بكرة بنقعد عالحيطة وبنسمع الزّيطة
- بلادٍ ما ابتعرف حدا فيها, شمّرْ ووسّخ فيها
- بلعب بالبيضة والحجر وبنقش بالسّبعة الأبر
- بنت الفارة حفّارة
- بنحطّكن بين الخيل تِرعين, بنلاقيكن بين القُدُش تِطوين
- بنسأله مين هو أبوه؟ بيقول لنا هارون أخوه
- بنقول له ثور بيقول إحلبوه
- بوس الأيدين ضحك عا اللّحى
- بوس الكلب في ثمّه تا تقضي حاجتك منّه
- بوكل الطّراف بوسخه, وبلعن أبو مين سلخه
- بوكل مع الذّيب وبِحزن مع الرّاعي
- بيت السّبع ما بخلاش من العظام
- بيت العقرب لا تَقرَب, وببيت الحيّة أفرش ونام
- بيحبّ الكّبرة ولو على خازوق
- بِيرمي كل عشرة في بير وبيقول يا ربّي التّدبير
- بيشهلق زيّ القديش
- بيطيش عا شِبر ميّه
- بيعشّيني أكلة سمينِة وبينيّمني عا علقه سخينِة
- بيفصّل للبرغوث قميص
- بيلايمش اللوق إلا بيظ مسلوق
- بيموت الزّمّار وأصابعه بتلعب
- بين حانا ومانا, ضاعت لحانا
- بيهزهز زيّ بيض المغربل
- بيّضه للكلب بيحسّبه لبن
- تا ييجي الصّبي وبنصلّي عا النّبي
- تاجرنا بالاكفان بطّل حدا يموت
- تِرتِر وحرير, بسّْ على غطاية زير
- تسعة أعشار المرأة دهاء وآخر عُشر بلاء
- تسعة وتسعين دحرج مِيّة
- تسمع صوته وتقول يا نيّالك يا اطرش
- تضحك بلا اسنان, وتمشي بلا خُران
- تطلع وتفضح ولا تظل جوّات القلب تجرح
- تيتي تيتي, مثل ما رُحتي جيتى
- تيجي تصيده يصيدك
- ثلثين الولد لخاله
- ثِمّْها شبراوي يلزم له أزْرار وعَراوي
- ثور الله في برسيمه
- جاجةٍ حفرت عا راسها عفرت
- جارك القريب ولا أخوك البعيد
- جبنا الأقرع تا يونّسنا, كشف عن قرعته جنّننا
- جبنا سيرة القطّ أجا لنا ينطّ
- جبناك يا عبد المعين تعين, لاقيناك يا عبد المعين تِنعان
- جحا أوْلى بلحم ثوره
- جِدي ما بلعب بعقل تيس
- جَزاة المعروف لطّ كفوف
- جمل محلّ جمل بَرَخ
- جميلِة الكلب ولا جميلتُه
- جوّزت بنتي تأرتاح من بلاها, رجعت إلي وأربعة معاها
- جوّع قطّك بيصيد فارك, وشبّع كلبك بحرسك
- جَوّى السَّلّ وبيكاكي
- حارة شبابيكها حُمر, والعيشة فيها بتقصّر العُمر
- حامت الحايمة وأجت فوق راس هالنّايمة
- حاميها حراميها
- حبّ العواجيز طِعِم وامزيز
- حبسوه مع ابليس في كيس, طلع ابليس منّه يستغيث
- حّبك في قلبي يا بهيّة زيّ حبّ الاقرع للكوفيّة
- حبيبك ببلع لك الزّلط, وعدوّك واقف لك على الغلط
- حِجّة بفرجة
- حجر وفي مطرحه قنطار
- حرامي إبن حرامي, بسرق الكحلة من العين
- حسّبت الباشا باشا, أثاري الباشا زلمة
- حطَ الجرّة عا ثمّها, تطلع البنت لأمها
- حطّ راسك بين هالرّوس وقول يا قطّاع الرّوس
- حطّوك امسحّر, خِلص رمضان
- حكي القرايا موش زيّ حكي السّرايا
- حلاة الزّيارة غارة
- حلاق بضحك على اقرع بطقطقة المقصّ
- حلم الجوعان عيش
- حِلّي عنّي يا بنِت, حِمل الجمل ميكِل زِفت
- حماتي في طبريِّة, وصوتها واصل ليّي
- حَنّ الموس للشِّعرِة يا بو حُسام
- حيّرتينا يا قرعة من وين نبوسِك
- خالصة ... ما فيش إشي اللي يتقاتلن عليه الظّراير
- خدّ امعَوَّد عاللطيم
- خذ الحلو واقعد اقبالُه, وان جعت بتشبع من جمالُه
- خُذ من النّذل ولا تعطيه
- خذ من كلامه وازرع قُطّين
- خذوهم بالصّوت لا يغلبوكم
- خصينا الجمل، استفحلت النّاقة
- خلّف الملعون كلب
- خَلقِة باب بيردّ الكلاب
- خلّي العسل في اجراره, تا منّها تزيد اسعاره
- خلّيها في القلب تجرح, ولا تطلع برّه وتفظح
- خَنّق جَنادب وعِدّ ارواح
- خير ما فيه ودخّانه بِعمي
- داير عالنّير والنّير عا كتفه
- دارت الدّورة وأجت عا راسك يا عورة
- دبّور ما منّه عسل
- دخول الحمّام موش زيّ خروجه
- درب تودّي ما تجيب
- دعوة وليّة في ساعة مغربيّة
- دَقّ المسامير في الرّوس ولا مقارعة التّيوس
- دقّة عالحافر ودقّة عالمسمار
- دلّع إبنك برضيك, ودلّع بنتك ابتخزيك
- دلّعناه شخّ عا الصّينية
- دود الخلّ مِنّه فيه
- دودُه من عوده
- دور الدّورة ولو دارت, وخذ بنت العمّ ولو بارت
- دَوّر عا الحمير التّايهة بتلاقيها في أوّل العجّال
- دوري في كل البلاد, ولا توخذي واحد عنده اولاد
- ديك امفرعِن عا مُقباته
- ديك وبيصيح على مزبلة
- ذان من طين وذان من عَجين
- ذبّان ما بيهدّي إلا على ال ...
- راح العيد وفرحاته, وأجا الخوجة وقتلاته
- راح تا يُرجُم إبليس, صِحي إبليس ورَجمُه
- راح قدّوم ورجع منشار
- راح يدوّر الفايدة رجع وخسارته زايدة
- رافق المِربح تِربِح, ورافق المِقشِل تِقشِل
- راها راها وكليبها وراها
- ربنا ريّح العريان من همّ الغسيل
- ربنا يهنّي سعيد بسعيدة
- رجعت حليمة لعادتها القديمة
- رجلين عوج وبدها بابوج
- ردّ الجواب عداوِة ولو بالهداوِة
- رزق الهبل عالمجانين
- رظينا بالهمّ والهمّ ما رظي فينا
- ركّب العدس وانفخ تحته, ما أطقع من الخال إلا إبن أخته
- ركّبناه على الحمار, مدّ إيده على الخُرج
- ريت المعدّل ما يموت
- ريحِة الجوز ولا عدمُه
- زبّال وشاكل له وردة
- زمّار الحيّ ما بيطرِب
- زمن منكوس برفع الرّجول وبخفّض الرّوس
- زمن غريب بيخلي البِسّة اتوِخّ في الذّيب
- زيّ أباريق الجامع, كلّ واحد شِكل
- زيّ البرغشِة تسمع الهرِج والوشوشِة
- زيّ البسّ اللي كابّ الرّوبِة
- زيّ البيظة ما إلها وجه من قفا
- زيّ الذّيب طبعه غريب, إن شفته هرب وان ما شفته وثب
- زيّ القرع بيمدّ لبرّه
- زيّ القعْقَع ما يتّاكل غير تا يتفقّع
- زيّ اللي بتعلّم البيطرة في حمير النّوّر
- زيّ اللي حامل السّلم بالعرض
- زيّ الواوي هاج وماج, لمّا اتخربش في السّياج
- زيّ خصّا الكلاب, بِخصي الكلب بشلم وبُغسل النجاسة بعشر قروش
- زيّ شعير البيّاع, كل حبّة شكل
- زيّ عجايز الفرح, أكل ونقوَرة وبسّ
- زيّ كلب الفرس موش عارف هواها, إن جرت جِري معاها وان وقّفت وقّف حذاها
- زي مصيّفة الغور, لا هي صيّفت ولا سترها ظلّ عليها
- زيّ نوري حجّة, املغمط الثّمّ خالي الباطنة
- سألوا البغل عن أبوه الغالي, قال لهم أنا الحصان خالي
- سبع صنايع والبخت ضايع
- سقى الله عليك يا أيّام الحصايد, لما بقينا انغمّر ونقصّد قصايد
- سكران بضرب في ميّت, لا الأوّلاني صاحي ولا الثاني داري فيه
- سلاح البُشت إمرايِة ومُشط
- سمرة ونِغشة ولا بيظة ودِفشة
- سنة "الهوا" باربعة وعشرين قيراط
- شاب ولا تاب
- شبّ اقشعيني يا مَرة
- شحّاد وبتشرّط
- شحمة عا فطيرة
- شريك "الهوا" إخسَر وخسّرُه
- شعرة على شعرة بتصير لحية
- شفناها قُبّة حسّبناها مزار
- شنب ما تحتيّه فلوس, ما خَرْجُه غير حفّة موس
- شو بتعمل الماشطة في الوجه العِكر
- شو فهّم الحمير في أكل الزّنجبيل
- صابح القوم ولا تماسيهم
- صابونة العرب لحاها
- صاجك ما بيقلي وكفتيرتك ما بتغلي, وأنا ليش جيت لك يا قلة عقلي؟
- صار لأم ستيت بيت وللقرعة جدايل
- صار لل ... مَرَة ويحلف عليها بالطّلاق
- صار للشّرشوحة مرجوحة ولأبو بريص قبقاب
- صام صام وأفطر على بصلة
- صباح الخير يا جاري, إنت في دارك وأنا في داري
- صباح القرود ولا صباح الاجرود
- صحّ لها جوز قالت عليه اعور
- صرصور وهدّى عا لطعة
- صفّي النيّة ونام في البرّية
- صيت الجمل قتله
- صيت غنى ولا صيت فقر
- ضُحكِة عنزِة عا باب مسلخ
- ضحكته ما إلها مَثايل, ولا قرقعِة السّناسِل
- ضرب الحبيب زبيب وحجارته قُطّين
- ضربوا الاعور على عينه, قال لهم مضروبِة خِلقة
- ضيف البلد حسد, وضيف الحارة خسارة
- طاح الدبّ تا يرقص, قتّل سبِع ثَمن تُنفُس
- طبّ الجرّة عا ثِمّها, ابتطلع البنِت لإمّها
- طبّاخ السّم ذاقه
- طبيخاته بلا خِرفان, وداير يعزم عالجيران
- طحّان ما بيغبّر عا حلّاس
- طُخّه وصيبُه وقول نصيبُه
- طرشة وبتتنصّت عالابواب
- طلبوها اتعزّزت, دشّروها اتندّمت
- طلطميس ما بعرف الجمعة من الخميس
- طلع من البليلة بلا حمّص
- طلّق لك هالخايبِة ولوْ توخِذ بدالها شايبِة
- طمع الضّيف ومدّ ايده
- طمعنْجي بنى له بيت, فلسنْجي سكن له فيه
- طنجرة ولاقت غطاها
- طوبة على طوبة, خلّى العَرْكِه منصوبة
- طول عمرك يا زبيبة, وانتي فيكي هالعود
- طولة الرّوح بتطلّع الرّوح
- ظِريَت قطّتنا السّمرة عأكل الصّيصان
- عا ريحة الحُمّيظ أكلنا عروقه
- عا قدّ فراشك مدّ اجريك
- عالحساب, لا انت عاقل ولا الناس مجانين
- عامل زيّ الطّير الهندي, مغناه بَرّه واشخاختُه عندي
- عامل زيّ خَصّا الكلاب, بِخصي الكلب بخمس قروش وبيغسِّل النّجاسة بعشرة
- عامل زيّ صوص التّين, بوكل وبينين
- عدوّ جدّك ما بودّك لو عبدته مثل ربّك
- عذر أقبح من ذنب
- عِدّي يا رجالك عِدّي, من الاقرع للمصدّي
- عرايِد في وِجه الرّيح, بترجع عا صاحبها صحيح
- عريسنا بين العرسان لابس, وعريسهم بين العرسان عابس
- عزيمة وزحمِة وطبيخ بلا لحمِة
- عَشان شقحة بطيخ عملها إلنا جعجعة وصريخ
- عشبِة وقطمها جحش
- عصاة المجنون خشبة
- عصفور في الإيد ولا عشرة على الشّجرة
- عضّة أسد ولا نظرة حسد
- عِفِصْ وطِفِسْ وإشي بيصُدّ النِّفِسْ
- علّمناهم الشّحدة سبقونا على الطّوابين
- على بخت الحزينة سكّرت المدينة
- على قدّ فراشك مدّ اجريك
- عُمر طه ما سوّاها
- عملوها الصّغار واتلقّوها الكبار
- عند البطون غابت الذّهون
- عند السُّخرة زيّ المُهرة, وعند اشغيلي مال حيلي
- عند الغولة عرس, قالوا يقدّيها ويقدّي اولادها
- عندك عيش وعندي عيش, وفراغة العين ليش؟
- عنزِة ولو طارت
- عوّاد ما عاد يعيدها
- عيش يا قديش تا يجيك الحشيش
- عيشة الفهيم مع البهيم سُقم وعمى
- عيشة ديك يوم ولا عيشة جاجة دوم
- عين بصّاصة, تندقّ فيها ارصاصة
- عين ما تشوف قلبٍ ما يحزن
- عينين زُرق واسنان فُرق
- غاب القطّ إلعب يا فار
- غاسِل بُطنُه وناشرُه
- غراب ودّى وما جاب
- غُلب وستيرة ولا غُلب وفظيحة
- فاظية مشغولة مثل أمّ العروس
- فالج لا تعالج
- فخّار يكسّر بعضه
- فرخ البطّ عوّام
- فرخ يزقّ عُتقي
- فظيحة وعليها شهود
- فقران باع ولده لطفران, الثاني اشتراه بالدّين
- فلاح مكفي سلطان مخفي
- فولة وانقسمت نُصّين
- في اذيالُه إوعى تبيّت, بيحسّس في جياب الميّت
- في الوِجه امرايِة وفي القفا امسَلّايِة
- قاظي الاولاد شنق حاله
- قالوا شو بدّه الاعمى؟ قالوا قفّة عينين
- قال له بسهّي لك, قال له صاحي لك
- قال له يا بوي بدّيش أنام بِحذاك, قال له بتريّحني من ريحة فساك
- قالوا أسلمت سارة, قالوا لهم لا زوّدت المسلمين ولا نقّصت النّصارى
- قالوا للحرامي إحلف, قال قرّب الفرج
- قالوا للحمار: إنت عالعرس معزوم, قال لتنقيل الميّة والحطب مفهوم
- قالوا للديك صيح, قال لهم كلّ شي في أوانه مليح
- قالوا للقردة اتبرقعي يا قبيحة, قالت وجهي متعوّد على الفضيحة
- قالوا له شو عرّفك إنها كذبة؟ قال من كُبرها
- قالوا له عدّ غنماتك يا جحا, قال لهم واحدة نايمة وواحدة قايمة
- قالوا لها أطبخي قالت مريضة, قالوا لها اتفضّلي قالت وين معلقتي العريضة
- قيل ما يتعشّى فيّي اتغدّيت فيه
- قدّ الكبيبِة وشواربُه هيبِة
- قدّ النّملة, وبتعمل أكبر عملة
- قدّ السّدرة عا الهِدرِة
- قرد موالف ولا غزال مخالف
- قرعان واتقاتلوا على مشط
- قرعة بمشطين وعورة بمكحلتين
- قرعة ومشطها نصّ اذراع
- قرعة ويتناطح إمّ قرون
- قطّة مِلِك ولا جَمل شِرِك
- قليل البخت بيلاقي العظم في الفشّة
- قليل العقل داريه, لا تبيعه ولا تشاريه
- قماقمي وخماخمي مثل صرصور "ال... "
- قهوته ما بتنذاق وقعدته ما بتنطاق
- قولها في وشّه وبلاش تغشّه
- قوم انصرف بلاش زحمة, خير ما فيك ودخّانك بِعمي
- قيراط بخت ولا قنطار شطارة
- قيس قبل ما تغيص
- كاسر إيده وبشحد عليها
- كإنّك يا بو زيد ما غزيت
- كبّوا القهوة من عماهم وقالوا الخير جاهم
- كثر الشّدّ برخي
- كثر الواجب بيقلل القيمة
- كحّت وفاقت, وعطست وراقت
- كركعت والقيد فيها
- كسرنا الدّف وبطّلنا الرّقص
- كفّ ما بيناطح مخرز
- كلّ إشي بالسّيف, إلا المحبّة بالكيف
- كلْ أكل الجمال وقوم قبل الرّجال
- كل الدّيوك تدّكني حتى انت يا ممعوط الرّقبة
- كل تأخيرِة وفيها خيرِة
- كل شي قرظة ودين, حتّى دموع العينين
- كل طلعة وقدّامها نزلة
- كل فولة والها كيّال
- كل مانو عا دينه الله يعينه
- كل مانو معلّق من عرقوبه
- كل مع الكافر ولا توكل مع طويل الأظافر
- كُل وادفس جُوّه لبعيد, يا صَحّة يا امْرِوّة حديد
- كلام الليل مدهونٍ بزبدة, ومن طلع عليه النهار يسيح
- كلبين ما بتّفقوا على عظمة
- كلمة بَتّ ولا عشرة لَتّ
- كلمة بتحَنّن وكلمة بتجَنّن
- كلّه عند العرب صابون
- كلوا رزقكم قامت القيامة
- كنّس بيتك ما بتعرف مين يدوسه, وغسّل وجهك ما بتعرف مين يبوسه
- كوم احجار ولا هالجار
- لا أهلا ولا سهلا ولا الطريق امعزّلة
- لا بِدّي الهِرش ولا امحالاتُه, ولا المخبّى جُوّى جيباتُه
- لا بيِهدا ولا بيِسْلى, مثل الحبّة في المِقلى
- لا بيهشّ ولا بينشّ
- لا تأمّن للاقرع ولا توخذ منّه نصيحة, لو ربنا بيحبّه كان خلّاها صحيحة
- لا تبيع برخيص ولا توصّي حريص
- لا تدلّ البدوي على باب دارك
- لا تذمّ ولا تشكر غير بعد سنة وستّ تُشهُر
- لا تركب الحمارة وأهلها في الحارة
- لا تِشمَتي فيّي يا خدّوجة, أنا عورة وانتي عرّوجة
- لا تطوّل الحبل لإبنك أحسن ما يشنق حاله فيه
- لا تعيّب في العايب, ولا ترقّع في الذّايب
- لا تعيّريني يا كِشرة. أنا فجّارة وانتي حِشرة
- لا تفرحي كثير يا أم الولد, بكرة بنتي تكبر وتسكّنه برّات البلد
- لا تقهرني ولا أقهرك, الزّمان دهمنلي ودهملك
- لا تقول فول إلا تا يصير في المكيول
- لا تقول للمغنّي غنّي, إلا تا يغنّي لحاله
- لا تلقّح يا مخفوف, أنا مهفّت وانت ملقوف
- لا تنام بين الدّبابير وتقول على الله التّدبير
- لا تنام بين القبور ولا تشوف منامات وِحشة
- لا للسّيف ولا للضّيف
- لا للصّدة ولا للهدّة ولا لعثرات الزّمان
- لا مع سيدي بخير ولا مع ستّي بخير
- لا هو أصيل جَدّ ولا احمر خَدّ
- لاحق العيّار لباب الدّار
- لاحني ولِحتُه, ومن حمّ عزمي جيت تِحتُه
- لاقيني ولا تغدّيني
- لحاف العيرة ما بيدفّي, وان دفّى ما بيكفّي
- لحم كلاب في ملوخيّة
- لسان ملس وقلب نجس
- لسانه من رُطب وإيده من خَشب
- لطعة ومقسومة بخيط
- لو اتصالحوا القطّ والفار, يا خرابك يا ديار
- لو الميّة في الزّير بتروب, المكلّحة عن كلاحِتها بتتوب
- لو انّك شعير ما نهّقت عليك الحمير
- لو بِدّي من هالأبر المقَرّمِة, كان صارت المسطبة امعَرّمِة
- لو تجري جري الوحوش, غير نصيبك ما بتحوش
- لو عرفوا حلاوة هرجته, ما عيّروني هيك بعرجته
- لو فيه خير ما رماه الطّير
- لولا الغيرة ما حبلت الأميرة
- لولا الكاسورة ما عمرت الفاخورة
- لو ما ركّبتك عا حماري ما عرفت شو فيه خُرجي
- ما ابتتحفّف العورة, إلا والقاضي زعلان
- ما أجتش العتمة على قد إيد الحرامي
- ما أكذب من شبّ اتغرّب إلا شايب ماتت اجياله
- ما بتعرف خيري غير تا اتجرّب غيري
- ما بتنام نوربّة وتحت راسها رغيف
- ما بجيب الرّطل غير الرّطل ونصّ
- ما بحسد المال إلا اصحابه
- ما بدهاش يا أمّا ارحميني
- ما بظرطش إلا من ثُقبة وسيعة!
- ما بعجبه العجب ولا الصّيام في رجب
- ما بعرف الخمْس من الطّمْس
- ما بعرف كوعه من بوعه
- ما بنطري سيرة الذيب والا هو قريب
- ما بيصدّقش ال ... إلا تا يرى
- ما بيظلّش عا المَداوِد غير هروش البقر
- ما تلاقي الطّقعِ الحِزِق إلا عا الجحش المغيّر
- ما جمّع إلا تا وفّق
- ما حدا بستجري يقول للعروس طقعتيه
- ما طول بِخلى من هَبل, ولا قُصر بخلى من جِنّ
- ما ظلّ في الخمّ غيرك يا مقطوع الذّنب
- ما عندوش من اكريش خبر
- ما في حدا بيقول عن زيته عِكر
- ما في أشي ببلاش غير العمى والاطراش
- ما فيش إعور غير إعور الدّير؟
- ما فيها غير صِوّير وعِوّير واللي ما فيه منّه خير
- ما قدرش عا الحمار أتشاطر عا البرذعة
- ما قدرش عا حماته, اندار على مراته
- ما لِقيوش في الورد عيبة, قالوا له يا احمر الخدّين
- ما يتجمّع النّاموس إلا عا هالضّيف المنحوس
- ما يحلوَ الغُنُجْ غير عند الحمير العُرُجْ
- مال الكُنَزي للنُّزَهي
- مثل البوم ما بزعق إلا عالخراب
- مثل الحكومة ما الهاش صاحب
- مثل السّيل بغدر في النهار والليل
- مثل الفريك ما بيحبّ الشّريك
- مثل القطاط بسبع ارواح
- مثل بقر التّركمان, حليبهن بالقطّارة وجعيرهن امملّي الوديان
- مثل سيرة الحيّات, إن بلّشت هات تُخلص
- مثل مزح السّبعاويّة, غير بالخنجر والشّبريّة
- مثله مثل البِزِر المُرّ, لا بنفع ولا بيضُرّ
- مجمع الخلان بيت إم عامر
- مجنون بحكي وعاقل بسمع
- مَرْتِ المنحوس لا هي مطلّقة ولا هي عروس
- مركب الضّراير سار, ومركب السّلافات وِقف واحتار
- مزح الرّعيان إمراجَمِة وفَشَخان
- مُزرابي طالع برّاني, أسقى الغريب وخلاني
- مشتراة العبد ولا تِرباتُه
- مشغول زيّ أم العريس
- مطرح ما تِرزق إلزق
- مطرح ما تِرسي دقّ لها
- مطرح ما سوّاها شَنقوه
- مع البوش عايشين في حوش
- معميّة وعارجة وكيعانها خارجة
- مفارقة البدوي بعباة
- مكتوب عا باب الجنّة عمر حماة ما حبّت كنّة
- مِن أقبلت باظ الحمام عالوتد, ومِن أدبرت نطّ الحمار عالأسد
- من أمّنك لا تخونه ولو كنت خاين
- من برّة رخام, ومن جوّه سخام
- من برّه طقشة طقشة ومن جوّه زفت محشي
- من تحت الدّلف لتحت المُزراب
- من ثمّك يا كحلة أحلى وأحلى
- من دِهنُه قلّي له
- من طين بلادك لُطّ اخدادك
- من عاشر القوم أربعين يوم صار منهم
- من غربَل الناس نخّلوه
- من غير كيسَك يا مذرّي ذرّي
- من قلّة الخيل شدّوا عالحمير سروج
- من قلة عقلِك يا بدور خلّيتيني في الحارة مشهور
- مَن كبّر عصاته ما ضَرب
- من كثر ما طالبناكم, بطّلت كلابكم علينا تِعوي
- مِن مِطرح ما بتأمّن خاف
- مِن نقّلت ما بقّلت
- منكّس الطاقيّة وعاملها عنتريّة
- من يوم ما عضّيتها عجرة
- موت يا حمار تا يجيك العليق
- موش كل الأكلات زلابية
- موش كل مرّة ابتسلم الجرّة
- موش كل مين حطّ عا راسه شملِة صار شيخ, ولا كل مين بنى قبّة صار وِلي
- موش كل مين صفّ الصّواني صار حلواني
- ميّة مالحة ووجوه كالحة
- ميّة من تحت تبن
- ميكل شارب ومن الهمّ هارب
- مين رادك ريدُه, ومين جافاك زيدُه
- ناس توكل جاج وناس تقع في السّياج
- نام بكّير وفيق بكّير وشوف الصّحة كيف بتصير
- نام وارتاح بيجيك التّفاح
- نصّ البطن بغني عن مَلاه
- نوم الظّالمين عبادة
- نومة وتمغيطة أحسن من فرح طيطة
- نيّال من بات مغلوب ولا بات غالب
- نيّة الصّياد في مِخلاته
- هبلة ومسّكوها طبلة
- هذا اقرع ما مشّطته
- هرب من عُزرين أجاه قبّاظ الرّواح
- هَرجُه زيَ هرج الحمير, خشخشة ورفس وتحفير
- هيّ الجمل وهيّ الجمّال
- هين قِرشك ولا تهين نِفسك
- واحد شايل دقنه وواحد تعبان فيه
- والطول طول النّخلة, والعقل عقل السّخلة
- والله وطلع من النّتش يواصيل!
- والله وطلع من دار المطبّلين امزمّر!
- واوي سرط منجل, عند خراه تسمع عواه
- واوي حِرِد عا صفحة
- وجع ساعة ولا وجع كلّ ساعة
- وجهه بقطع الخميرة من البيت
- وجهه ما بضحك للرّغيف السّخن
- ودّينا حسن تا يجيب حسين, راح ولا أجونا الاثنين
- وراك وراك والزّمن طويل
- وردِة من زردِة
- ورّيناه وِجِه شخّ لنا عالصنيّة
- وقت الكباب صكّوا الباب, ووقت الملوخيّة نادوا عا هالمدهيّة
- وين ما تروح أبو مُزراق مواليها
- يا بتحكي في المُفيد, يا بتحِلّ عنّا بعيد
- يا بحر الله خُذ عبد الله
- يا بخت من بنى وعلّى وراح وخلّى
- يا بختك يا قصيرة, جوزك بيشوفك وبيحسّبك صغيرة
- يا بطني يا امشحوِطني يا امسمِّعني كلام النّاس
- يا بَكسر لكم زيركم, يا بَروّح وما باجي لكم
- يا جاي من غير عزومة يا قليل القيمة
- يا جايبُه يا مشتهيه
- يا حافر جورة السّوّْ يا واقع فيها
- يا حفيظ من السّتات, ما عندهم غير خذ وهات
- يا داخل بين البصلة وقشرتها ما ينوبك غير ريحتها
- يا رايح كثّر من الملايح
- يا طالب الدّبس من ثُقبِة النّمس
- يا تطُخّه يا بتكسِر مُخّه
- يا طول مشيِك في البراري حافيِة
- يا عيني إذا على خير رِفّي وإذا على ويل كُفي
- يا غريب كون أديب
- يا قاعدين يكفيكم شر اللي جايين
- يا قرعة يا تنّينة, دقّي راسك في التّينة
- يا قلبي يا كُتكُت: قدّيش تشكي وتبكي, وقدّيش تسكُت
- يا ما أحلاني وأنا كَرمي دِبس, ويا ما أقلّني لما كَرمي يِبس
- يا ما تحت السّواهي دواهي
- يا ما جاب الغراب لإمّه
- يا ما في الحبس مظاليم
- يا ما كسّر هالجمل بطّيخ
- يا مبدّل الحمار بحمار, إلا فيهن واحد عَيّار
- يا مترجّي السّمنة من شحم النَملة عمرك ما بتلاقي ولا حتّى القملة
- يا مدبّر حمير العرب دبّر احمارك
- يا مسترخص اللحمة عند المرق تندم
- يا مستعجل وقّف تا قول لك
- يا مِعجبك الطّول يا خايب الرّجا
- يا معزّي بعد سنة يا مجدّد الاحزان
- يا ميخذ القرد على ماله, يروح المال ويبقى القرد على حاله
- يا ويل من كان علّته من جوّى بيته
- يِخرَب بشوري ولا يِعمَر بشورَك
- يعزموا قارون وقابس والعريان واللّابس
- يعطيك العافية قدّ ما مشت الجاجة حافية
- يكفيك شرّ جوعان وشِبع
- يموت الزّمار وأصابيعه بتلعب
- يوم عرسه أوجعه ضرسه
- يوم على وجه الدّنيا ولا عشرة تحتها
ملاحظة: من يتحفنا بالمزيد في هذا السّياق بالذّات, فليتفضّل مشكورا.
شارك بتعليقك